Қазақстанда құжаттарға қосарланған есім жазуға рұқсат берілді

17:08, 3 желтоқсан 2019   663

Бұл туралы Парламент Мәжілісінің депутаты Майра Айсина айтып берді. Жаңа өзгерістер «ҚР кейбір заңнамалық актілеріне мемлекеттік қызметтер көрсету мәселелері бойынша өзгерістер мен толықтырулар енгізу туралы» Заңында көрсетілген. «Қосарланған есім беру мәселесі қазақстандықтар арасында түсініспеушілік туғызып отыр.

Яғни, бала құжатындағы әкесінің қосарланған есімі бойынша түзету енгізіліп отыр. Бұған дейін әкенің аты тек бірге жазылатын немесе қосарланған есімнің біреуі ғана берілетін.

Яғни, әкесінің аты Асан-Әлі болып, дефиспен жазылса, бала құжатында Асанұлы немесе Әлиұлы не болмаса дефиссіз Асанәліұлы болып бірге жазылатын. Заң жобасында бұл мәселе қаралды және дефиспен жазуға рұқсат берілді», - деді Майра Айсина Орталық коммуникациялар қызметінде өткен баспасөз мәслихатында.